Святкаванне Міжнароднага дня роднай мовы

У дзяржаўнай установе адукацыі “Сярэдняя школа аг.Юбілейны” ў межах тыдня беларускай мовы і літаратуры   была падрыхтавана праграма святкавання Міжнароднага дня роднай мовы.

Вучні 5 класа з задавальненнем прынялі ўдзел у інтэлектуальным турніры “Зліваюцца гукі ў словы”, а шасцікласнікі паказалі свае веды ў лінгвістычнай гульні “Пагуляем у роднае слова”.

Развіць свой інтэлектуальны патэнцыял, павысіць агульны культурны ўзровень гаварэння  вучні 8 класа змаглі ў лінгвістычным батле “ Ведаю мову”. Вучні 10-11 класаў удзельнічалі ў інтэрактыўнай віктарыне “Адгадай фразеалагізм”, вучні 9 класа актуалізавалі свае веды па беларускай літаратуры, выканаўшы фотатэст “Славутыя сыны краіны”. 20 лютага вучні 5-6 класаў наведалі школьную бібліятэку і прынялі ўдзел у гадзіне роднай мовы “Роднай мовы пералівы”.

Адкрыццё свята 21 лютага  пачалося з  акцыі “Гавары са мной па-беларуску”.  Вучні 8 класа   наведалі кожны клас і пазнаёмілі прысутных з унікальнымі рысамі беларускай мовы.

Вялікую цікавасць выклікала акцыя “Чытаем-перакладаем”. Удзельнікі  атрымалі магчымасць паказаць свае перакладчыцкія здольнасці. 

Педагогі, вучні 10-11 класаў ўстановы адукацыі  далучыліся да напісання  Гродзенскага абласнога дыктанта, прысвечанага Міжнароднаму дню роднай мовы.

Вучні 5 -11 класаў школы з вялікім задавальненнем прынялі ўдзел у  конкурсе малюнкаў па творах беларускіх пісьменнікаў, конкурсе чытальнікаў вершаў  на вершы беларускіх пісьменнікаў “Гучы, роднае слова!” Кудзеля Дар’я, Ляута Віялета, Ляута Ілона былі адзначаны членамі журы за выразнае і  артыстычнае чытанне вершаў.

На працягу ўсяго святочнага дня гучалі песні беларускіх выканаўцаў на роднай мове.

Праведзеныя мерапрыемствы дазволілі яшчэ раз далучыцца да  адметнасці і прыгажосці беларускага слова.